毛澤東誕辰127周年 神舟十號返回艙落戶湖南

早兩日係已故中國領導人毛澤東誕辰一百二十七周年，喺內地各地都有唔少紀念活動，甚至各地都有大批民眾專程去到毛澤東家鄉湖南韶山。而喺當地，甚至仲有數以萬計嘅人專程冒住嚴寒齊集喺當地嘅銅像廣場，去倒數呢一日嘅到嚟。

除咗有民眾自發嘅活動慶祝毛澤東誕辰之外，湖南韶山當地都有一項好特別嘅儀式。神舟十號載人飛船返回艙就喺26日正式決定落戶湖南韶山，仲喺當日完本交接之後決定會長期喺韶山毛澤東紀念館陳列，當日仲有唔少儀式人員向毛澤東銅像敬獻花籃。

咁到底呢次儀式有咩特殊意義呢？神舟十號太空人代表張曉光同埋少先隊員就喺飛船返回艙交接儀式上朗誦詩詞《水調歌頭重上井岡山》，當中就有一句「可上九天攬月，可下五洋捉鱉，談笑凱歌還。世上無難事，只要肯登攀」。據了解，喺五十年前毛澤東親自批准「曙光一號」載人航太計劃，呢個計劃被視為後續中國載人航太事業發展嘅重要基礎，所以今次呢個儀式亦都被外界理解為係向毛主席告慰。