「嶺南丸」由香港開往澳門 途中遭美軍空襲炸沉?

喺1944年12月嘅24日，當時香港仲係經歷緊三年零八個月嘅日子，當年由內河運營組合所屬輪船「嶺南丸」就喺香港開往澳門，但點知途中就發生咗一件悲劇。

喺當日早上嘅11點，載有468人嘅「嶺南丸」由香港開往澳門，當時同行嘅仲有「福海丸」輪及小型輪船「新東安」。當呢幾艘輪船駛至香港西面主要水域龍鼓水道嘅大小磨刀附近，就突然被上空3架美軍戰機俯衝低飛以機槍掃射，當場就已經有好多乘客中槍被擊斃，船上亦都即時秩序大亂。

喺美軍一輪掃射之後，三架軍機就飛到高空再投落炸彈，其中第一彈擊中「嶺南丸」煙囪，跟住再中埋第二彈全船即時炸裂，繼而沉沒。當場有唔少乘客被即時炸死，部分生還嘅就只有抓住大型傢俱飄流海上。當時深水埗警憲知道情況後，就即時派員乘船前往施救，最終就救返121人，其中24人受傷，總共有347人葬身大海。