之前阿史講過佐敦谷水塘曾經係用嚟專門儲存海水去畀市民當廁所水用，今次就想講下香港用鹹水沖廁嘅原因。

其實呢個原因唔難估，就係為咗慳返啲食水喇！响上世紀五十年代，香港人口急速增加，都市化發展令淡水供應出現好大壓力。當時嘅樓宇如果有自動沖水設備，都係會用淡水嚟沖廁，極度嘥料。响1957年，當時政府就响石硤尾同李鄭屋邨安裝海水沖廁系統以作試驗，後尾就擴展至九龍各區。當局發現同海水沖廁效果唔錯，於是就大肆推廣，响六十年代尾香港島同九龍大部分地區已有海水沖廁系統。不過，最初海水沖廁係要按量收費嘅，直到1972年先改為免費。

為應付呢個新轉變，當時政府就興建大量海水抽水站、蓄水池及鹹水管作配合，上次提及嘅佐敦谷水塘就係其中一個設備喇！

原圖：網絡