汪精衛發「艷電」叛國

汪精衛被後世人稱為漢奸，呢樣嘢相信史友們都聽阿史講過幾次。佢响1938年12月29日發出咗一段「艷電」，成為咗佢一生其中一個重要轉折點，咁呢封「艷電」係乜嘢嚟呢？

1937年抗日戰爭全面爆發後，日本除咗對華用兵外，仲响佔領區個度建立好多附屬政權，希望做到以華制華。1938年11月，日本首相近衛文麿發表咗《東亞新秩序》聲明，宣稱「帝國所希求者即建立確保東亞永久和平的秩序，此次征戰的最終目的即在於此。此種新秩序的建立，應以日、滿、華三國合作，在政治、經濟、文化等方面建立連環互助的關係為根本。」。近衛呢個聲明其實表明咗日本企圖迫使國民政府放棄抗戰立場，達到不戰而勝嘅目的。

當時仲係國民黨副總裁汪精衛，就响1938年12月29日發出電報，表示響應《東亞新秩序》，支持對日妥協。電報之所以叫「艷電」，係因為當時嘅電報係以地支代替月份，以韻目代替日期，响韻目表當中，29日嘅韻目電報代碼就係「艷」。