早兩日阿史就介紹到喺黑色聖誕節之後，香港就經歷三年零八個月嘅日子，而後來重光之後，時任嘅總督楊慕琦就先返到英國休養，而當時由英國嚟到香港接受日軍投降並且出任香港軍政府首長嘅，正正就係夏慤。關於夏慤嘅生平，相信唔少史友都相當熟悉，咁今次阿史就介紹下呢條以佢命名嘅道路——夏慤道。

夏慤道今時今日就已經係中西區一條主要嘅道路，連接住灣仔告士打道同埋中環干諾道中，而喺二戰之前，其實告士打道同埋干諾道中都係畀當時嘅海軍船塢分隔住，來往中環同埋灣仔嘅車輛唔少都需要繞道去到金鐘道，聽落都覺得唔方便。

呢個情況去到1950年代，當時港府就決定喺海軍船塢對出嘅位置進行填海,原本停泊添馬艦嘅位置隨即就變成一條新路，呢條就係1961年落成並且通車嘅夏慤道喇！

原圖嚟自網絡