今日係元旦,雖然係受到疫情嘅影響,但中上環、尖沙咀仍然都仲有唔少慶祝嘅活動。喺呢個日子,阿史就諗返起當年今日發生嘅一件慘劇,呢件就係蘭桂坊發生人踩人慘劇。

喺1993年12月31日嘅除夕晚上,蘭桂坊同以往一樣都係唔少市民同遊客指定嘅慶祝地點,呢一年氣氛仲要特別好,現場仲有商業電台架設嘅舞台同埋巨型氣球,去到就嚟倒數嘅時候,就已經有成2萬人聚集喺呢個地方,喺倒數之前現場仲有人噴射噴霧綵帶、噴霧雪花、噴灑飲料,令到地面相當濕滑。

而去到到數嘅之後嘅一分鐘,消防處就派出第一架救護車去到現場,原因係因為現場有事故發生,而第二架救護車就係0時08分出發。原來喺新年倒數之後,人群之中有人打架生事,市民亦都因為咁而好快向德己立街往下行離開,但點知去到十字路口嘅時候意外就發生。有市民就目擊到有一排人牆同時跌倒,隨後嘅人亦都因為後方嘅人繼續推撞而跌倒,就係咁樣造成骨牌效應。

據當時消防報告指出,至少有5層嘅人牆堆疊埋一齊,其中有150-200人被困。事件發生後,大量傷者倒臥喺道路兩旁,造成21人死,60幾人受傷,相當慘痛!

原圖嚟自網絡