尋日就係1月1日「元旦」，喺全世界新曆曆法入面嘅新年第一日，但喺中國歷史上，「元旦」其實喺幾個唔同朝代都曾經更改過，就好似商朝係以夏曆十二月初一為「元旦」，漢朝就係以夏曆正月初一為「元旦」。咁史友們可能都會有個問題，就係今時今日嘅「元旦」係幾時同埋由邊個定呢？

其實即使去到清朝末年，相關嘅紀元主張仍然有唔少知名學者提出過，就好似康有為主張孔子紀年、劉師培提出黃帝紀年等等。而去到1912年，清朝滅亡之後，孫中山就任臨時大總統，當時就通報咗各省，表示「中華民國改用陽曆，以黃帝紀元四千六百零九年十一月十三日為中華民國元年元旦」，而呢一日亦都係中華民國元年1月1日。

去到1913年10月6日，袁世凱成為中華民國第一任大總統，就將孫中山早前提出嘅建議變成一個法令，公曆新年稱之為元旦。嚟到1949年9月27日，中國人民政治協商會議第一次全體會議決定採用世界通用公元紀年法，並將公曆1月1日正式定為「元旦」，農曆正月初一改為「春節」，「元旦」就係咁樣嚟喇！

原圖嚟自網絡