呢幾年內地都興起唔少手遊,其中一個遊戲仲會以歷史人物為角色,加入唔少打鬥對戰,當中李白亦都被列入其中,化身刺客型嘅角色,身手敏捷。咁問題嚟喇,到底歷史上李白係真係「打得」,定還是係遊戲公司搞錯咗呢?

李白係文人、係詩仙相信唔使阿史講大家都會知道,而按照史料入面記載,當時唐代有三絕,分別係李白嘅詩、張旭嘅草書同埋裴旻嘅劍。據講原來當時李白曾經想向劍術首屈一指嘅裴旻拜師,亦都有啲講法話李白直頭係裴旻徒弟,而李白嘅劍術亦都唔差,只係僅次裴旻。

喺李白嘅詩入面,「劍」係詩作中經常出現嘅一隻字,而佢自己喺史料入面亦都被形容係「劍術自通達」、「十五通劍術,遍於諸侯」等等,所以李白好可能唔止作詩犀利,就連舞劍都有一手!

原圖嚟自網絡