漢桓帝算唔算昏君？

漢桓帝陵園遺址最近被確認嘅報道阿史之前同史友們分享過，今次阿史就想同大家討論一樣嘢。前個幾年內地史學界好流行翻案，阿史就睇到一啲文章，就話重用宦官又好色嘅漢桓帝，並唔算係昏君。呢個講法好似同我哋以往讀書認知好唔同，咁又係乜嘢一回事呢？

漢桓帝劉志係東漢第十一位皇帝，佢十五歲個陣被外戚梁冀立為漢帝，後嚟到佢長大後就連同宦官單超等人殲滅梁冀同佢梁氏族人。而响佢統治期間，朝政敗壞，又發生黨錮之鍋，同埋佢自身荒淫無道，所以後世人對佢評論都唔多好，例如諸葛亮响《出師表》就提及：「親賢臣，遠小人，此先漢所以興隆也；親小人，遠賢臣，此後漢所以傾頹也。先帝在時，每與臣論此事，未嘗不嘆息痛恨於桓、靈也。」

咁點解有人會話漢桓帝唔算昏君呢？其中一個講法就話被追謚為「桓」，按《謚法》曰：「克敵服遠曰桓。」即係佢有一定武功先會有呢個咁正面嘅謚號。而漢桓帝最大武功，應該就係平定羌亂。當時桓帝任用皇甫規、張奐、段颎，以「殺為主、降為輔」策略平定羌亂。其中段颎响逢義山之戰中，大敗東羌，令禍亂東漢邊境達百年嘅東羌平定咗。