早兩日阿史就同大家講到因為新機場興建嘅緣故,大嶼山以北嘅大小磨刀都被削平,關於呢兩個小島嘅故事又點止咁少?今次阿史就同大家介紹下當時喺大磨刀之上好出名嘅礦場——五福礦場。

五福礦場由五福礦業喺1952年至1971年期間運營,係一個專門出產石墨嘅礦場。早喺1923年就有相關嘅人士去到大磨刀島西南角發現石墨,去到1951年就有一位叫做Tang Hon Fung嘅先生聯同其餘四位人士以十萬蚊嘅資本創立公司,其後就申請採礦許可證,開始喺大磨刀島開採石墨。

當年島上就有30名礦工居住,唔少嘅設施都係喺大磨刀島西南邊。大磨刀島上嘅石墨品質相當高,當年唔少都出產到英美,淨低品質差啲嘅,就喺本地用作製磚燃料。雖然呢個礦場係位於島上,但喺1955年嘅產量就達到1500噸,去到50年代尾仲去到3000-3500噸。

時間去到1970年代,呢個礦場就已經開採到海平面下90米,據指其實係可以開採到300米之下,但由於成本問題,礦場就喺1971年停產喇!

原圖嚟自網絡