北京天壇係模仿得來？

如果史友們去北京旅遊，除咗故宮同長城外，就應該會去天壇。呢個馳名中外嘅世界遺產，係中華文化嘅瑰寶。不過，可能大家唔知，其實北京天壇都係仿製品。

先介紹一下北京天壇先，北京天壇建於明成袓永樂年間，作為明清兩代帝王祭祀皇天、祈五穀豐登嘅場所，由於中國以農立國，風調雨順甚為重要，所以天壇响明清時期係一個極為重要嘅地方。

其實，北京天壇係明代永樂年間仿南京天壇形製建，南京天壇又稱大祀壇、圜丘，係明太祖朱元璋下旨興建。據史料記載，天壇係一座圓形建築，共有兩層，四面各有九級台階，台面同台腳都用琉璃磚砌成，四周為琉璃欄杆。本來祭天同祭地係分開唔同地方舉行，圜丘祭天，方丘祭地，但後嚟朱元璋就下旨要天地合祀，所以天壇就成為天地壇。