上次介紹香港淪陷期間,沙田短槍隊突襲啟德機場,令日軍暫緩搜索美國空軍嘅飛行教官克爾中尉,响呢件事中,帶隊個位就係東江縱隊嘅傳奇人物劉黑仔。

劉黑仔原名劉錦進,寶安縣大鵬城人。但由於皮膚黝黑,所以被人叫做劉黑仔。1939年加入咗中國共產黨同埋廣東人民抗日游擊隊,1941年佢就擔任廣東人民抗日游擊隊惠陽大隊短槍隊小組長。响香港淪陷後,佢就潛入香港,奉命任廣九短槍隊副隊長。

而佢响香港期間,除咗突襲啟德機場為人所熟悉外,佢仲有幾件事廣為人知。好似佢活捉日本憲兵大佐、特務頭子東條正之,當時東條正之帶同兩名手下喬裝到新界視察,結果劉黑仔假扮係汪偽政權嘅人,悉破對於身份並活捉咗佢。另外,佢開住東條正之架車,到漢奸特務隊長蕭九如响金龍酒家擺下嘅豪門宴,將佢擊斃。因此,當時日軍就重金懸賞緝拿劉黑仔。

响幾年前電影《明月幾時有》,彭于晏就飾演過劉黑仔,唔知史友們有無印象呢?

原圖:網絡