「圍魏救趙」係點嚟？

早幾日阿史喺介紹到沙田短槍隊同埋劉黑仔果陣，就講到佢哋當時係「圍魏救趙」突襲啟德機場，咁到底「圍魏救趙」係咩招數，又係出自邊度呢？阿史今次就同大家介紹下啦！

所謂嘅「圍魏救趙」係兵法「三十六計」入面嘅第二計，原本嘅句子就係「共敵不如分敵，敵陽不如敵陰」，意思即係話面對強大嘅敵人，不如設法分散先再打，而呢個兵法並唔係憑空出現，而係出自「孫臏救趙」嘅故事。

喺戰國時代，魏圍攻趙都邯鄲，而趙國就向齊國求救，當時齊王就叫田忌、孫臏率軍援救，當時孫臏就諗到魏國係以精銳攻趙，國內防守空虛，於是就決定攻打魏都大梁，亦即係「批亢搗虛」。結果，魏將龐涓趕回應戰「疾走大梁」，並且喺桂陵受到孫臏伏襲。孫臏喺呢次戰事採用到嘅招數，一舉擊敗魏軍，並且令到趙國自動解除危機，後世就用「圍魏救趙」稱呼呢個策略。