「馬踏飛燕」定係「馬踏匈奴鷹」

近日中國考古界出現咗一項爭議，事源就係中國首都師範大學考古系蘭強教授公布，舉世知名嘅銅奔馬腳下所踩嘅並唔係燕子，而係匈奴所祟拜嘅雄鷹。呢個銅奔馬「馬踏飛燕」嘅講法早喺1971年就由郭沫若同埋甘肅省博物館臨時負責人王毅賦予同埋催生，雖然係叫咗好多年，但歷代都有學者提出質疑，認為馬下嘅鳥類唔係燕子，有可能係「馬超龍雀」、「馬神天駟」等等。

咁今次呢位蘭強教授又係點樣講呢？呢位教授今次嘅理論就係同墓主有關。銅奔馬喺1969年甘肅武威雷台漢墓出土，墓主乃張姓將軍，喺歷史上參加戰爭嘅機會唔大，加上墓入面又曾經出土過一套青銅軍事儀仗俑隊，同霍去病墓前「馬踏匈奴」石雕像類似，所以好大機會係為咗紀念功勳。

而甘肅蘭州博物館館長都表示，呢個銅奔馬係東漢末年青銅作品，而霍去病將軍攻打匈奴就係西漢嘅時候，兩個時間點差咗三百幾年。早喺蘭強之前就已經有唔少學者提出「燕同馬關係十分疏遠」、「銅奔馬踏的鳥生理結構似鷹不似燕」等講法，所以應該叫做「馬超飛鷹」。