民國時期國貨熱潮

記得細個個陣，香港就有唔少國貨公司，呢啲國貨公司專買內地生產嘅貨品，質量未必係最好，但好多時因為價錢相宜，所以好受大眾市民歡迎。之但係，以前國貨會比人老土嘅印象，大叔阿嬸先會去買。咁史友們又有無諗過，國貨响以前係代表最潮呢？

阿史所講嘅最潮，就唔係款式，而係個種先衛精神。响民國時期，中國就興起咗國貨熱，唔少國民都好支持國貨，呢股熱潮就同當時國家狀況好有關係。首先，响清末民國現代化輕工業興起，所以有唔少商人吸收外國商品嘅生產技術，响中國境內自設廠房生產，國產商品亦係咁响市場興起。而另一個更重要原因，就係自清末民初時，帝國主義列強憑藉政治特權同經濟優勢，大肆蠶食中國商品市場。因此，為咗打擊帝國主義，唔俾佢哋响中國領土內作威作福，所以工商業界都提倡支持國貨，既可振興中國經濟，也可以減少外國對中國嘅剝削。而响當時，被國人抵制最厲害嘅就係日本貨品。

當時支持國貨行動仲有一個重要推手，就係國民政府喇！當時國民政府曾經三次推動支持國貨行動，全國各地國貨界一致響應，頗具聲勢同成效，推動經濟之餘又能團結國人。