尋日就同史友們講到謝纘泰為楊衢雲報仇，發動「大明順天國起義」但最後都係事敗收場，關於謝纘泰嘅故事當然唔止得咁少，仲有一張好重要嘅歷史圖片可以同大家介紹一下！

唔知史友們又認唔認得呢張圖呢，呢張圖被稱為《時局圖》，係中國近代史上相當著名嘅一幅時事漫畫，圖入面就係就展示咗當時中國瀕臨被列強瓜分嘅地步，作者特別想通過呢張圖去喚醒國人。咁呢張圖又同謝纘泰有咩關係？關於《時局圖》嘅作者歷代都有幾個唔同嘅講法，有指係晚清政治家黃遵憲，而另一個主流講法就係話由謝纘泰題詞繪製。

呢幅《時局圖》最早刊於1898年7月嘅香港報紙《輔仁文社社刊》，正正就係由謝纘泰所創立，其後去到1903年就由蔡元培主編嘅上海報紙《俄事警聞》轉載，當時就改咗名叫做《瓜分中國圖》。

今時今日大家睇到嘅可能已經係新版本嘅時局圖，但喺原版圖入面，係冇5個中國人嘅畫像，純粹係用各種動物同埋圖案表示各國，即係熊、犬、蛤蟆、腸、鷹以及太陽等象徵當時成個東南亞局勢，真係一目了然。

原圖嚟自網絡