萬國建築鼓浪嶼

早前介紹過山東青島一啲歷史，响中國有部分城市保留著好多西式建築，形成獨特城市面貌。青島舊城區係其中之一，而廈門鼓浪嶼亦係當中之一。

鼓浪嶼位置福建廈門市，係我國著名旅遊景點，更有「海上花園」美譽。而呢個地方最出名，就係大片西式建築群，當中就包括滙豐銀行經理公館、鼓浪嶼福音堂、美國領事館、英國領事館、日本領事館等。好喇！咁點解鼓浪嶼呢個地方有咁多咁有特色嘅建築呢？响1842年清廷被迫同英國簽訂《南京條約》後，廈門開闢為通商口岸。之後陸續有傳教士同商人响鼓浪嶼落地生根，起學校起教堂，鼓浪嶼就開始出西洋建築。

另一個原因，就係原來同滿清政府阻日本攞著數有關。响甲午戰爭後，日本佔領咗台灣，清政府就怕日本會佔領埋對岸福建省廈門市，所以清政府就「邀請」各國响鼓浪嶼開設使館。响1902年，英美德法日等九個國家就簽訂《廈門鼓浪嶼公共地界章程》，鼓浪嶼成為咗公共租界，其後各國陸續响鼓浪嶼設立領事館同埋一啲設施。