早排阿史喺介紹宋王臺遺址嘅時候就講到其中一位清朝遺老陳伯陶，而當時同陳伯陶一齊嚟到香港並且後來進行文化研究嘅仲有另一位遺老，佢叫做賴際熙。

賴際熙出生喺1865年嘅廣東增城，係晚清光緒二十九年嘅進士，先被授予翰林院庶吉士，後來就出任國史館纂修，所以佢又被稱為「賴太史」。喺辛亥革命之後，賴際熙無意事新朝，所以就同一眾原本喺廣東嘅遺老嚟到香港，專心做國學研究。時間去到1913年，香港大學就聘任賴際熙為漢文講師，仿照廣東廣雅書院學制，教授史學和經學。賴際熙負責「史學」同埋「正音班」。

1923年，賴際熙就更加同陳伯陶等同道成立「學海書樓」聚書講學，宏揚中國文化，當時唔少富商好似何東、郭春秧、利希慎都出錢購書支持呢件事，學海書樓一度有幾十萬本書畀市民閱讀，係未有公共圖書館之前嘅最大圖書館。

去到1925年，漢學家金文泰就任香港總督，推動中文教育，喺賴際熙同埋區大典建議之下，金文泰支持香港大學成立「中文學院」，並且由賴際熙領導。之但係，去到1933年，香港大學文學院進行改組，將「中文學院」納為文學院一系，賴際熙亦都喺呢個時候結束他任教香港大學二十載嘅日子。

原圖嚟自網絡