早兩日就係周恩來總理逝世嘅日子,提起周恩來其中一樣比較有趣嘅事就係,佢促成咗中美嘅「熊貓外交」,呢件事係同一包煙有關!

其實早喺1950年代,美國佛羅里達州同埋美國芝加哥動物園都曾經聯絡過北京動物園,表示想「以貨幣或動物交換中國一對大熊貓」。雖然當時中華人民共和國對外文化聯絡局係同意呢個決定,但後來又因為需要先互派人員訪問而令到呢件事告吹。

時間去到1972年2月,當時美國總統尼克遜攜夫人抵達北京進行訪問,喺到達北京第二日尼克遜夫人就去到北京動物園參觀並且同大熊貓玩得相當開心,仲買咗一大堆熊貓玩具,臨走前仲依依不捨。當時中方就意識到其實美方有意想要大熊貓,而當時北京動物園就只係得3隻雌性大熊貓,其中兩隻已經決定會送畀前蘇聯。喺之後嘅一次訪問會上,當時國務院總理周恩來將熊貓牌香菸遞畀尼克遜夫人,就話:「我要送你們兩樣東西」,當時尼克遜夫人就問:「煙嗎?」周恩來就答,「我要送給你們兩隻大熊貓」,結果當時尼克遜夫人相當驚喜。

喺尼克遜結束訪問之後嘅兩個月,「玲玲」同埋「興興」亦都去到華盛頓動物園,尼克遜夫人亦都親自去到迎接佢哋,1972年美國亦都出現一股熊貓熱!

原圖嚟自網絡