過去一年因為疫情嘅關係，海洋公園先後經歷三次嘅閉園，甚至仲陷日財困，到底可唔可以營運落去都仲係一個未知之數。而喺1977年嘅今日，對海洋公園嚟講就係一個幾特別嘅日子，事關呢一日就係海洋公園正式開幕嘅日子。

呢個位於港島黃竹坑黃竹坑道180號、佔地達到91.5公頃嘅樂園，今時今日係集齊海陸動物、機動遊戲同埋大型表演於一身嘅主題公園，但最初嘅設計原來係好簡單。

海洋公園嘅前身係1950年代開幕嘅巴黎農場，入面曾經有住世界各地搜羅返嚟嘅動物、亦都有餐廳同埋兒童遊樂場設施。時間去到1972年，政府就因為要撥地興建海洋公園，令到巴黎農場結業。海洋公園最初嘅設計分成內園區嘅水族設施好似「海豚劇場」、「珊瑚館」；至於外園區就係野餐草地、餐廳同埋觀鳥園等。

海洋公園嘅建造工程喺1972年7月開始，歷時四年幾耗資1.5億港元建成，喺當年今日就由港督麥理浩主持開幕禮，喺5日之後就正式向公眾開放，當年仲因為預訂門票人數太多而一度停售門票。

原圖嚟自網絡