尋日阿史就講到喺二次世界大戰期間,日軍就喺唔少東南亞國家強逼、詐騙、擄掠民間婦女去為日軍提供性服務。喺戰後,中國、韓國同埋唔少東南亞國家都紛紛向新日本政府展開漫長司法訴訟,甚至日前首爾法院仲裁定日本須向慰安婦賠償1億韓元。而喺呢場漫長嘅訴訟入面,「慰安婦少女銅像」相當具標誌性。

呢個雕像設立嘅目的係要求道歉同埋紀念,早喺1992年1月開始,由於要求日本政府道歉呢件事上得唔到回應,喺韓國就有韓國挺身隊問題對策協議會等團體每逢星期三都會到日本駐大韓民國大使館門前舉行示威活動,呢場就係進行過超過一千次嘅嘅「水曜示威」而喺事隔接近20年之後,有人就實現咗一個構想。

當時鐘路區區長金映鍾建議設立藝術作品形象嘅少女銅像,並且由藝術家金運成同埋金曙炅夫妻共同製作,銅像係一個身穿近代韓服嘅短髮少女,手握雙拳凝視住日本大使館,成個畫面就好似思索日本軍慰安婦問題。而喺紀念碑上面,亦都有慰安婦受害者吉元玉奶奶寫嘅和平碑文字。

「慰安婦少女銅像」最早喺韓國出現,其後喺美國、中國、香港、德國都有陸續設置。

原圖嚟自網絡