香港「海員大罷工」開始

喺1922年嘅今日，香港爆發咗一次歷史上相當重要嘅罷工事件，呢件事就係海員大罷工。喺第一次世界大戰之後，踏入1920年代唔少地區都面對住通貨膨脹嘅問題，之但係工人嘅人工就甚少上調，結果就令到唔少基層工人生活相當艱苦。

時間去到1921年底，香港兩大英資公司渣甸同埋太古船務公司海員要求加薪，但呢個要求就被僱主拒絕。去到1922年1月底，由孫中山鼓勵同埋命名而成立嘅「中華海員工業聯合總會」就展開大罷工，工會向所有罷工海員派發每人每日4毫5仙到1蚊生活費，結果一個星期之內就有接近6,000個海員參加，就連碼頭起貨工人、煤炭工人都相繼加入，令到人數一時之間返到三萬幾人，香港海運即時停頓。

雖然罷工行動相當有效，但當時資方仍然拒絕加人工。為咗應對罷工行動，當時港英政府就採取強硬手段，例如宣佈戒嚴令、武力封閉位海員工會等等，但結果就令到社會各界相當同情海員，發起十幾萬人嘅大罷工。海員代表、港府官員、船公司代表嘗試談判，但最後都冇結果，港英政府仲喺外地招募新工人，但就引嚟罷工海員封鎖香港，唔少工人亦都喺呢段期間北上返回華界。