早幾日阿史就講到當年留美幼童當中有唔少都係精英、建樹晚清,之但係喺留學期間,駐美公使陳蘭彬不斷地要求撤回學生,原因係佢覺得學生習染西洋風氣,甚至歸信基督教同埋剪辮,結果令到朝廷准奏召回幼童,而當中亦都有幾位幼童堅持唔返去。

原定十五年嘅幼童留美計劃中途就取消,詹天佑、歐陽庚順利完成學業;容揆、譚耀勳抗拒召回;至於李恩富、陸永泉之後先至重新返到美國。呢批中國史上第一批官派嘅留美學生回國之後,到底社會係點樣睇佢哋呢?留美接近10年嘅幼童,喺返到國家嘅時候等待佢哋嘅原來並唔係歡迎。

1881年9月29日嘅《申報》就係咁樣樣寫到,「國家不惜經費之浩繁,遣諸學徒出洋,孰料出洋之後不知自好,中國第一次出洋並無故家世族,巨商大賈之子弟,其應募而來者類多椎魯之子,流品殊雜,此等人何足以與言西學,何足以與言水師兵法等事。」《申報》仲進一步描述指呢班學生「性情則多乖戾,稟賦則多魯鈍,聞此輩在美有與談及國家大事及一切艱巨之任皆昏昏欲睡,則其將來造就又何足觀。」

原圖嚟自網絡