提起北角,自不然會諗起春秧街,而呢條街道亦都有幾個唔同嘅稱呼,就好似「小福建」「小上海」等等,咁到底當中有咩原因呢?阿史今次就同大家介紹下啦!

呢條位於北角嘅單向街道,連接住糖水道同埋北角道,有住近百年嘅歷史,同時亦都係北角建區以嚟最繁華嘅街道,連旅發局都將呢條街道列為香港旅遊景點之一。春秧街嘅命名雖然好易令人聯想到農夫春日插秧,但其實呢度嘅「春秧」係指當時北角區嘅開發商郭春秧。佢喺1920年代喺北角進行過填海、發展過地產項目等,對北角區有住唔少嘅貢獻,於是當時港府就用其中一條街命名嚟紀念。

言歸正傳,春秧街點解會有「小福建」「小上海」之稱呢?原來呢一帶居住嘅居民唔少都係早期抵達香港嘅移民,就算係三、四十年代抵達嘅移民,都已經算係後期喇。咁喺呢批移民入面,以福建籍最多、上海人亦都有唔少,喺街道兩旁就有專門售賣福建、上海等地道食物嘅店舖,所以就直頭畀人叫做「小福建」、「小上海」喇!

原圖嚟自網絡