喺古代嘅中國，好長嘅一段時間都係男女不平等，甚至仲有啲傳統觀念係認為「女子無才便是德」，所以就算喺隋朝開始就設立科舉制度都好，都冇出過一個女狀元。

睇到標題嘅史友都知道，阿史今次係想同大家介紹中國史上唯一一位女狀元，佢就係清末太平天國開創科舉女科而產生嘅女狀元傅善祥。傅善祥生於清道光十三年（1833年），幼年時父母雙亡，依靠兄嫂供養，但就憑自己飽學經賦。喺佢13歲嘅時候，佢就被哥哥指腹為婚嫁畀其他人，但就喺成婚後5年因為丈夫離世而畀奶奶賣走，無路可逃之下佢就選擇加入太平軍。

喺1853年，太平天國平定咗南京，當時就開科取士，破例增加埋女科，傅善祥知道呢個消息後就報名應試，一舉高中狀元，天王洪秀全仲畀佢出任掌朝儀，喺太平天國年間發表過多篇文獻就好似「天朝田畝制度」、男女平等、禁食鴉片、禁女裹腳等。

之但係，傅善祥嘅一生並唔係咁好過，佢後來被被東王楊秀清招到東王府擔任女主簿，仲成為楊秀清六十幾個妻妾之一，不時都被暴打一場，自此以後亦都再同政事無關。提到佢嘅死因一直都流傳唔同講法，有指佢係喺太平天國戰敗後服毒自盡；又有指佢係被士兵姦殺，棄屍秦准河，學富五車但最後都係含恨而終，真係令人慨嘆。

原圖嚟自網絡