响辛亥革命之後無耐，孫中山先生就响1912年元旦就任中華民國臨時大總統，相信呢啲史事都唔駛阿史多講。不過，阿史以前都講過，1911年出現嘅革命起事個陣，孫中山一直居於國外，未曾參與其中，咁點解佢最後會被選為臨時大總統呢？

武昌起義之後，十幾個省陸續宣佈脫離清政府獨立，當時清廷無力駕馭北洋軍鎮壓起義，唯有重用袁世凱。响11月1日，袁世凱更被任命為內閣總理大臣。但另一方面，革命黨人以及獨立各省都希望拉攏袁世凱呢位軍事強人，等佢幫助完成革命，仲許諾佢做民國首任大總統。

响個陣袁世凱便處於一個境地，一面係重用自己嘅清廷，一面係大勢所趨嘅革命。於是袁世凱就同革命黨人開始秘密談判，史稱「南北談判」。袁世凱代表北方軍，革命黨就係南方軍。伍廷芳、唐紹儀分别代表南北雙方，而革命軍方面提出清帝退位、選舉總統、建立共和政府等，但袁世凱就遲遲唔就共和表態。各省代表組建臨時政府過程中，其實就已經打算將總統位置留俾袁世凱，另外兩次選舉大元帥同副元帥，黎元洪同黃興响當選後都唔願意就任，革命陣營一時群龍無首。就响呢個時候，孫中山先生响外國返咗中國，佢老人家就被大家當作係德高望重嘅不二人選，於是孫中山先生就咁直接當選為臨時大總統。「臨時」二字，自然係有頂住先嘅意思。最終，袁世凱通電「贊成共和」，孫中山亦將「臨時大總統」一職讓俾袁世凱。

原圖：網絡