大嶼山有塊嶼南界碑?

香港有唔少好有代表性同歷史價值嘅界石界碑，就好似維多利亞城又或者長洲界碑咁，見證住唔同地區嘅發展。以上呢兩個地方嘅界碑大家都好大機會聽過見過，但如果講起嶼南界碑，大家又知唔知呢？

嶼南界碑，又叫做嶼南界石，早喺1902年就已經畀設立。呢塊界碑嘅設立同一條條約有關，早喺1898年清政府就同英國簽署咗《展拓香港界址專條》，就將新界連埋大嶼山都租借畀英國99年。於是去到1902年，英軍嘅少校力奇率領軍艦林保號抵達大嶼山，並且喺「大嶼山南方、東經線壹佰壹拾叄度伍拾弍分」設立圖中呢塊界碑。南部呢塊就喺狗嶺涌，喺大嶼山北部亦都有塊同時期設立嘅嶼南界碑。

如果有史友們親眼見過呢塊界碑，應該都會發現以上係刻有中英嘅碑文，原文就係「此界石安竪在大嶼山南方，即東經線壹佰壹拾叄度伍拾弍分。自此界石正南潮漲處起點，沿大嶼山西便一帶海岸向南直至北緯線弍拾弍度九分。大英一千九百二年，管帶霸林保兵艦水師總兵官力，會同本艦員弁等，勘明界址共立此界石」，清楚顯示新界租借地界線。