講到現時全港最長嘅跨海大橋，相信大家都知道會係港珠澳大橋，單單係香港段就已經有成12.6公里，咁以往香港又有冇啲比較長嘅橋呢？答案當然有，阿史今次就同大家講一講青荃橋啦！

呢條連接青衣島同埋荃灣嘅跨海大橋，橫跨藍巴勒海峽，長達1.5公里，曾經係全港最大嘅跨海大橋。由於呢條橋嘅位置正正就係青衣大橋北面，所以早年港府喺建橋嘅時候係打算命名為「青衣北橋」。

咁好地地有條青衣大橋，點解又會喺咁近嘅地方再起一條橋呢？原來喺1974年青衣大橋動工之後，青衣島唯一可以對外聯繫嘅道路就真係得呢一條，但當時青衣正正就係準備發展成新市鎮，唔少工程基建都需要進行，所以就經常出現交通擠塞嘅情況，於是去到1981年港府就已經計劃緊興建一條橋連接荃灣同埋青衣。

時間去到1984年，青荃橋建築工程敲定，當年喺區議會曾經對呢條橋嘅命名進行唔少討論，唔單止有「青衣北橋」，仲有「尤德爵士紀念大橋」嘅提案，而最後大橋都係正名為「青荃橋」，並且喺1987年12月10日啟用。

原圖嚟自網絡