上次阿史介紹抗俄義勇隊個陣,就提及過當中成員後嚟組織咗清末革命組織,上過中史堂嘅都知,同盟會係由興中會、華興會同光復會合組而成,今次阿史就想介紹下光復會呢個組織。

光復會成立於1904年11月,係以江浙為活動中心嘅革命團體。响上海正式組建時,由蔡元培出任會長。入會誓詞為「光復漢族,還我山河,以身許國,功成身退」。至於呢個組織最特別嘅地方,就係呢個組織以暴動、暗殺等作為鬥爭嘅主要手段。

而响同盟會成立之後,部分光復會會員加盟,但有部分會員仍以光復會呢個牌頭行動,而光復會會員仲組織光復軍,發動多次反清行動,著名嘅起義就有1907年徐錫麟領導嘅安慶起義,刺殺安徽巡撫恩銘;秋瑾策劃嘅紹興大通學堂起義;1908年熊成基响安慶發動嘅岳王會起義。不過呢幾次起義失敗後,光復會猶如無形解體。直至1910年,章炳麟响東京重建光復會,並出任會長,陶成章為副會長。武昌起義後,光復會會員响江浙地區同汕頭等地興兵響應。後嚟陶成章响上海被蔣介石刺殺,光復會就此解體。

睇返光復會成員,其實好多都係清末民初嘅名人,包括蔡元培、陶成章、徐錫麟、秋瑾、章炳麟、陳獨秀等,睇一睇原來好多猛人。

原圖:網絡