呢排天氣好，加上疫情關係，行山都係一個唔錯選擇（最好選擇當然係留响屋企）。雖然阿史唔係第一次去有「香港南極」之稱嘅蒲台島，不過上星期都再去多次，仲上山行咗去睇島上著名景點巫氏古宅。

巫氏古宅位於蒲台島大排塘山中間位置，係島上一個著名景點。關於呢個大宅嘅傳聞好多，而根據資料，呢個大宅係一名叫巫少棠嘅富商興建，佢原本係蒲台島居民（有傳聞就話佢係孤兒），後嚟响市區做生意發咗達，於是就响上世紀二十年代（一說三十年代）响島上興建一間大屋，作度假之用。不過呢間大宅响落成後無耐就荒廢咗。荒廢原因又係有唔同講法，一個就話巫少棠死咗之後大宅就無人理；另一個講法就係話佢有次响天后廟睇完神功戲，返到大宅就發現大宅被洗劫，佢因擔心安危決定唔要呢間大宅。而呢間大宅被荒廢後，就有唔少關於呢間大宅嘅鬼故出現，所以巫氏古宅又被稱為鬼屋喇！