早兩日就係抗戰老兵萬劍舞將軍逝世嘅日子,提起呢位傳奇人物,相信大家都會知道佢係滇緬戰爭嘅其中一位倖存者,咁阿史今日就同大家介紹下呢場戰爭啦!

滇緬戰爭,又叫做滇西緬北戰役,係抗日戰爭入面一場相當大型嘅戰役,發生嘅地方正正就係雲南省同埋緬甸北部交界地區。呢場戰爭喺1943年10月嘅時候發生,其實早喺1942年嘅時候,日軍就已經攻陷咗緬甸,並且諗住可以一路打到滇西、直逼重慶。

喺1942年5月嘅時候,其實中方嘅戰況相當唔明朗,日軍攻入龍陵、轟炸保山、侵入邊城騰衝,仲奪取到大片怒江土地。中方嘅遠征軍只能依怒江東岸設防據守,維持咗長時間嘅對恃。之但係,其實喺雲南省同埋緬甸北部交界有一條滇緬公路,係當時中國唯一一條陸路國際交通大動脈,亦都係負責戰時物資嘅運送。

失去咗呢條公路嘅控制權,令到唔少援華軍用物資都好難送到,於是喺1943年由中美英三國軍隊聯合組成嘅盟軍就就發動戰役,先係打算打通中印公路令到物資可以唔使單純依靠「駝峰航線」。而去到1945年3月,中國遠征軍、英軍以及麥瑞爾突擊隊喺芒友會師,日軍失去緬北要塞,重新控制滇緬公路。

原圖嚟自網絡