香港開埠第一條主要道路——皇后大道

尋日就係香港開埠180年嘅日子，而要發展一個地方首當其衝一定就係要興建基建，咁當年英國人第一條興建嘅主要道路又係邊條呢？答案就係皇后大道喇！

皇后大道今時今日就成幾段就好似皇后大道西、皇后大道中同埋皇后大道東，全長大約5公里嘅道路由石塘咀一直延伸到跑馬地，一路上亦都有唔少重要嘅歷史建築，見證住呢條道路悠久嘅歷史。皇后大道目前為止都仲係香港市區主要幹道，昔日就被稱為「大馬路」。

如果要追溯，建造皇后大道嘅工程就係由1841年開始，當年建造嘅時候係將西營盤同埋中環之間嘅山移平而開出一條大馬路，工程進行咗大概1年就落成一條全長4英里嘅馬路，呢個亦都係香港最早期嘅填海工程。如果史友有細心留意，應該會發現呢條用嚟紀念維多利亞女王嘅皇后大道原名「Queen's Road」，本來中文係應該叫做「女王大道」，但當年華人師爺就譯咗做「皇后大道」，將錯就錯之下就沿用至今。