「東、西九龍大動脈」——呈祥道

繼續同史友們介紹一啲香港重要嘅基建，如果大家有出入開九龍西北部，都一定有經過呈祥道，今次就同大家介紹下呢條被稱為「東、西九龍大動脈」嘅道路啦！

呈祥道位處香港7號幹線末段，連接住龍翔道、青葵公路、貨櫃碼頭南路同埋葵涌道，係一條三線雙程分隔道路。呢條道路嘅建成同觀塘工業區、葵涌貨櫃碼頭有莫大嘅關係。喺1960年代，當時港府就係為咗連暍呢兩個區域，令到香港工業有更好嘅發展，而決定沿住九龍群山山腰興建兩條新路。

由於當時要繞過已發展地區，所以興建道路嘅時候就只好由荔枝角大橋附近葵涌道開始，經過蝴蝶谷交匯處，最後連接到大埔道—龍翔道天橋。真係唔講唔知，呢條道路建成嘅時候，係以「呈祥道」命名，取自「麟趾呈祥」，亦都係為咗紀念當時香港總督戴麟趾。