提起律敦治，相信史友們即時都會諗起律敦治醫院，之但係同佢相關嘅醫院唔止得呢間，仲有傅麗儀療養院、葛量洪醫院等。關於慈善家律敦治嘅歷史同故事，史友們又知唔知呢？今次阿史就同大家介紹下

律敦治（Jehangir Hormusjee Ruttonjee）出生喺1880年嘅印度孟買，年幼嘅時候就跟隨母親嚟到香港，同經營洋酒進出口貿易嘅父親一同生活。佢喺域多利亞英文學校畢業之後，就幫爸爸手打理洋酒進出口貿易，去到1913年仲全權接手埋，業務都真係幾成功。但律敦治並冇因為咁而滿足，佢慢慢就涉足埋地產生意，喺中環、尖沙咀、深水埗等地方都有佢嘅地皮。

去到1930年代，佢創立咗香港啤酒廠有限公司，喺深井開始發展「HB啤」呢隻本土啤酒，當時都有返些少名氣。律敦治嘅故事當然唔淨止得創業同地產啦！喺三年零八個月呢段黑暗日子入面，律敦治同埋佢個仔鄧律敦治就親身幫過唔少帕西人、印度人，就算喺身處監獄入面，律敦治父子都諗盡方法去幫佢哋。好可惜，佢哋呢個舉動後來被日軍發現，佢哋喺1944年被捕入獄受盡折磨，直到日軍投降之後先至得到釋放。

熟悉律敦治故事嘅史友都知道，喺1944年果陣，佢第二個女蒂美因肺結核病逝，律敦治深受打擊亦都因此決心要宣揚防治肺結核。佢喺戰後促成防癆會成立，亦都捐咗好多錢創立律敦治療養院、傅麗儀療養院同埋葛量洪醫院，晚年嘅佢就主要專注於防癆工作同埋其他公益慈善事業。

原圖嚟自網絡