出開旺角嘅史友應該經常都會經過洗衣街，呢條由界限街連接到登打士街嘅街道，今時今日已經係油尖旺一個幾重要嘅地區，但大家又知唔知呢條街道前身竟然係條小水溪呢？

洗衣街所在嘅區域其實就係芒角村開發之前，用作灌溉附近西洋菜田嘅一條小水溪。隨住上世紀20年代附近嘅土地都平整興建住宅之後，住喺呢條水溪附近嘅婦女都會嚟到呢度，又或者直頭上門接啲衫嚟洗。由於呢條小溪當時主要被用作洗衫，所以附近嘅居民都叫呢度做洗衣街。

呢個現象維持咗十年左右，1930年代政府就將呢條水溪嘅水源截斷，仲將原來水溪經過嘅地方開闢成道路，呢條道路就成為大家今日所稱呼嘅「洗衣街」喇！

原圖嚟自網絡