之前阿史介紹過有講法話東漢神醫華佗係外國人,好多史友就留言討論係定唔係。其實華陀呢位神醫有好多故事流傳後世,有啲真又有啲係假。不過,有啲故仔即使好出名,但都可能係假。

呢個就係華佗幫關羽刮骨療毒嘅故事。相信史友們都聽過呢個故事,內容大概就係關羽响樊城之戰同曹操手下曹仁交戰時,中咗毒箭,之後華佗就操刀幫刮骨療毒,而關羽一路被開刀,一路捉棋,聲唔出一聲。不過,呢個故事只係元明時期流傳嘅民間故事,關羽刮骨療毒响《三國志‧蜀書‧關羽傳》就咁記載:「羽嘗為流矢所中,貫其右臂,後創雖愈,每至陰雨,骨常疼痛。醫曰:『矢鏃有毒,毒入於骨,當破臂作創,刮骨去毒,然後此患乃除耳。』羽便伸臂令醫劈之。時羽適請諸將飲食相對,臂血流離,盈於盤器,而羽割炙引酒,言笑自若。」即係話關羽被刮骨療毒應該真有其事,不過就《三國志》就無交代個位醫師係咁華佗。而睇返啲歷史時序,曹操因華佗屢次唔去曹營當侍醫而被處決,後嚟曹操幼子曹沖病重失救個陣,佢就後悔殺咗華佗。曹沖死個陣係建安十三年,而樊城之戰係發生响建安二十四年。所以,幫關羽刮骨療毒嘅就應該唔會係華佗喇!

原圖:網絡