古代嘅女性貪靚,有住唔少精美嘅裝飾品、化妝品,呢一啲都唔係乜嘢新鮮事,之但係原來喺春秋時期男性都開始有化妝?到底呢次嘅考古發掘發現到啲咩,阿史今次同大家介紹下啦!

其實今次要介紹嘅最古老男性化妝品早喺2017年就已經由考古團隊喺陝西省渭南市一座春秋芮國遺址男性貴族墓入面嘅一個微型銅罐搵到出嚟,只係當時考古學者對銅罐入面搵到嘅6克殘留物仲未清楚係咩嚟。

經過多年研究之後,考古學家對呢啲殘留物進行反覆分析,最後就發現,其實係由牛脂所製成嘅美白化妝品,無機成分主要係一水碳酸鈣。雖然有啲古書都有記載到以動物脂肪作為基質生產藥膏,但當中都描述得比較簡單,亦都冇實物驗證。呢次嘅發現相當有歷史價值,事關呢次係中國迄今發現最早男性化妝品、最早嘅面脂、同時亦都將中國先民製作美容面脂嘅歷史推早成千年。

原圖嚟自網絡