香港公園嘅英軍士兵銅像 其實係一戰士兵嚟嘅？

尋日阿史就同大家介紹咗點解九龍東軍營會改名叫做「奧士本軍營」，而其實香港仲有唔少地方都同加拿大溫尼柏榴彈兵營 A 連連士官長奧士本二級准尉 John Robert Osborn有關，甚至有啲地方仲係專門用嚟紀念佢，其中一個就係喺香港公園。

如果史友都曾經去過香港公園，應該都會記得其實公園入面零零舍舍就有一尊好突出嘅軍人銅像，如果唔畀提示大家，大家又知唔知呢尊銅像係邊個年代嘅軍人呢？

阿史咁樣問得就當然係有伏啦！呢一點亦都會大家經常會誤會，雖然呢尊銅像係被駐港英軍用嚟紀念二戰犧牲嘅軍人同埋喺渣甸山英勇戰死嘅奧士本，但實際上佢其實係一尊第一次世界大戰嘅英軍士兵銅像，係喺1930年代之前鑄成，原本就擺放喺淺水灣余堡（Eucliffe）入面，但去到1981年古堡清拆，銅像被轉送駐港英軍。銅像先係送到奧士本軍營衛室門前擺放，後來就喺1992年5月香港公園開幕嘅時候，轉移去到公園擺放，紀念奧斯本同埋二戰犧牲嘅軍人。