呢排都同史友們介紹咗唔少幾有特色嘅街名,就好似油尖旺區嘅洗衣街、西洋菜街,既然開咗呢個主題,就當然要同大家講埋書局街啦!

呢條位於北角嘅南北向單程路,由七姐妹道開始連接住英皇道、馬寶道,最後通往北角渡輪碼頭。呢條路係喺1937年9月24日命名,問題嚟喇,北角區嘅電氣道同埋琴行街都真係因為有發電廠同埋琴行先至命名,咁書局街又係咪因為有書局呢?

答案當然係啦!喺1934年果陣,當時原本位於西環吉席街嘅商務印書館就將佢嘅廠房搬到北角嘅新址,佔地面積仲有成14萬平方呎,認真誇張,令到當時政府都決定用「書局」嚟命名呢條街。之但係,去到1960年代,呢個書局廠房就拆卸,重建成僑冠大廈同埋僑輝大廈,書局街就咁冇咗一間大書局喇!

原圖嚟自網絡