繼續同史友們介紹一啲近代中國嘅一啲傳奇男女，曾國藩、李鴻章嘅歷史就同大家介紹過唔少，之但係如果講到佢哋兩人曾經嘅幕僚丁日昌，大家又知幾多呢？

丁日昌，生於1823年嘅廣東省惠潮嘉道潮州府，以二十歲之齡中咗秀才，雖然後來幾次想考舉人都考唔到，但當時惠潮嘉道李璋煜睇過佢嘅文章之後，都大讚佢係「不世之才」，跟手就請埋佢做幕僚。時間去到1854年，當時太平天國攻打潮州城，丁日昌就以廩貢生管治鄉團，以300個鄉勇援救並且生擒百幾人。

去到1861年，佢就成為咗曾國藩幕僚，先後被派往廣東督辦釐金軍火、亦跟隨過李鴻章治軍上海，喺呢段時間入面，佢就幫助籌辦水師、提出創建北洋、東洋、南洋三支水師，亦都主張過革新船政，請外國人返嚟教授技術等等，官至江蘇巡撫、兵部侍郎、都察院右副都御史。

丁日昌喺晚清實業、軍事國防、文化教育方面都有住唔少出色貢獻，佢唔單止勤於政務，佢仲悉心讀書，佢自己其中一個室名係「持靜齋」，當中佢就整過《持靜齋書目》五卷，難怪佢被稱為係清代三大藏書家之一。

原圖嚟自網絡