早排就同史友們介紹咗唔少以人名命名嘅屋邨就好似祖堯邨、勵德邨、家維邨等等,而其實以人名命名嘅公營房屋唔止得咁少,祈德尊新邨都係其中一個。

祈德尊新邨位於荃灣,所在嘅位置其實正正就係荃灣填海工程第一期嘅其中一個規劃區入面。呢條屋邨喺1985年開始興建,由香港房屋協會發展,歷時接近三年建成。講起呢條屋邨興建嘅原因,就同四季大廈有關!

喺1970年代初,當時政府就將原先係新界首個建成出租屋邨四季大廈轉咗土地性質,未來就會轉做休憩用途。原本住喺四季大廈嘅居民就需要有地方安置,於是1978年政府就將呢幅荃灣嘅新填海地撥出嚟興建房屋安置住戶。

祈德尊新邨最終就建成咗3幢40層高住宅大廈(A—C座)、1幢4層高年長者居住單位大廈,並且以1952年至1981年間擔任房協主席嘅祈德尊命名,用嚟紀念佢多年嚟嘅貢獻。

原圖嚟自網絡