今時今日無論係返工返學，定還是去第二區食飯買野，地鐵已經成為咗日常生活相當重要嘅一樣交通工具，而其實呢樣咁方便嘅交通工具歷史唔係太長，其中一個最繁忙嘅地鐵站都係喺1980年嘅今日先至開幕。

阿史所講嘅正正就係中環站！早喺1967年果陣，當時就已經有一份《香港集體運輸研究》發表，最初計劃係打算將中環站同埋上環站設計做港島線同埋觀塘線之間嘅轉線站，而荃灣線嘅尾站當時就打算係金鐘站，計劃入面嘅中環站亦都唔係依家嘅位置，而係租庇利街同埋畢打街之間德輔道中嘅一段地底。

而去到1970年，港府就搵咗顧問公司再做一份報告，即係後來發表嘅《集體運輸計劃總報告書》，當中就建議喺中環商業區設立兩個車站，當時係想叫做遮打站同埋必打站，只係最後都冇咁做到。

後來，中環站就由四大聯營公司興建，並且喺1980年2月12日配合地鐵修正早期系統啟用，當時就由尖沙咀延伸到中環，由觀塘搭到嚟就只需要27.5分鐘，中環就係成條線路嘅終點。喺當年今日，地鐵中環站舉行開幕典禮，初期就開放咗1號同埋2號月台。

原圖嚟自網絡