今日係農曆正月初三，亦係傳統習俗入面大家比較容易有口角爭執嘅一日，所以以往大家都唔會到親友果度拜年，只會留喺屋企靜靜地咁過。話就話呢一日容易發生口角爭執，但係到底有咩原因呢？

「赤口」又叫做「赤狗日」，又赤狗就即係赤狗神，係傳說入面嘅「熛怒之神」，「赤」就係面紅耳赤嘅意思，如果外出宴客就好容易沖犯赤狗，繼而同人嘈到面紅耳赤。咁當然呢個就係傳統嘅講法，如果初三都真係要出街嘅話，老一輩就會帶一道「化口舌符」出街，有啲更加傳統嘅長輩仲會喺出自己屋企門口同埋入其他人屋企之前，默念三次「唵，折隸，主隸，準提娑婆訶，佛母準提，千吉萬吉，消災解厄，百無禁忌」先至入門，唔知史友們又有冇聽過呢？

而喺初三呢晚，其實仲有一件盛事發生，就係「老鼠娶親」。傳說話呢一晚老鼠娶親係相當重要，傳統嚟講都唔會出街，仲會留喺屋企好早就瞓，為免打擾到鼠輩親事，而且仲會喺屋企灑鹽、米、糕餅，即係俗稱「老鼠分錢」，寓意新一年同老鼠共享收成。

原圖嚟自網絡