雖然今日大年初三赤口,但同時都係2月14日,係一年入面其中一個情人節,唔知史友們又準備好點樣為自己嘅情人慶祝未呢?既然係情人節,梗係要同大家介紹返呢個節日係點樣嚟,順便應一應節嘛!

關於情人節嘅起源一直流傳住幾個唔同嘅講法,但最主要嘅一個講法就係「瓦倫泰」傳說。相傳喺3世紀嘅時候,當時羅馬國王克勞狄二世雖然只係短短統治咗兩年,但作為一位軍人出身嘅皇帝,佢任內就發起過唔少重大戰役,亦都因為咁而需要大量兵力,所以佢下令所有單身嘅羅馬男性都要從軍,並且唔可以結婚。

當時就有一位天主教神父瓦倫泰Valentinus覺得咁樣對啲情人太殘忍,所以就秘密咁幫啲情侶證婚,結果佢就被發現拘捕,並且喺2月14日被執行絞刑。瓦倫泰死後,當時嘅人為咗紀念佢勇敢嘅精神,就將呢一日定為紀念日,慢慢就演變成後來嘅「情人節」喇!

原圖嚟自網絡