【講開有段故】盆菜起源同南宋君臣逃難有關?

可能因為疫情關係，今年大家都留喺屋企食飯，盆菜基本上都成為唔少家庭必點嘅一樣菜式，唔少餐廳都首度推出自家盆菜。之但係，今次唔少盆菜都出現貨不對辦嘅問題，唔少朋友未到初三就已經一肚火喇！盆菜就食得多，唔知史友們又知唔知呢種新界原居民傳統食物係點樣嚟呢？

盆菜嚟講相傳就有幾個唔同源頭，有講法就話係東莞市長安鎮，另一個主流講法就話係起源自新界嘅圍村，雖然講法有唔同，但呢種雜燴菜式就真係有幾百年歷史喇！

相傳南宋嘅時候君臣就因為被元軍入侵南逃，走到嚟華南、香港一帶，其中一個就係當時嘅名臣文天祥。佢橫渡伶仃洋，去到深圳嘅時侯，村民眼見佢同埋同行嘅將士飢腸轆轆，念在佢係忠臣嘅緣故，就將屋企僅餘嘅豬肉、蘿蔔、魚蝦等等整成菜式。由於當時呢啲村民屋企冇足夠碗碟，就只好用一個木盆盛載，呢款就係盆菜最初嘅款式喇！而另一個講法都係相當類似，只係故事嘅主角換咗做宋帝昺、陸秀夫、張世傑咁解！

傳統嚟講，新界鄉村每逢新居入伙、祠堂開光又或者點燈，村民都係一齊食返個盆賀一賀，所以盆菜都真係喜慶菜式嚟架！

原圖嚟自網絡