今年係牛年,牛係被視為相當有靈性嘅一種動物,世界各地亦都有唔少關於「靈牛」嘅傳言。唔知史友們又有冇印象,喺上世紀八十年代,其實香港都曾經有過一隻「靈牛」,而呢隻「靈牛」最後仲喺慈雲山一間廟宇安享晚年。到底呢段故仔係點?阿史今次就同大家介紹下啦!

相傳喺1983年,喺長沙灣嘅屠宰場每日都有唔少牛隻送到去屠宰,當年就有一隻牛,疑似係知道自己大限將至,唔食唔飲,喺面對屠宰之前對住屠夫落淚,甚至仲跪地求饒。呢個舉動唔止發生一次,屠夫兩次想殺牛,兩次都畀呢個舉動感動。最後屠夫就通知牛主,牛主亦都決定放生呢隻牛,轉輾之下呢隻牛就由慈雲閣主持答應收留。

喺慈雲閣一塊碑石上面就記載咗,呢隻牛喺1983年到達果陣,就已經有17歲。其後仲喺慈雲閣棲身長達11年,最終就因為年老而一病不起,最後由慈雲閣請來法師誦經超渡。喺靈牛「駐守」慈雲閣期間,唔少信眾都話收到「靈牛」屢次托夢,仲話自己係牛郎織女身邊「神牛」,認真神奇啊!

原圖嚟自網絡