如果史友們尋日有睇到新聞，應該都會睇到一個鋪天蓋地都傳緊嘅消息，就係有「中國最後原始部落」之稱嘅雲南翁丁村老寨因為火災，令到村內百幾茅草屋幾乎全部燒毀，而起火原因尚待調查。

呢座被燒燬嘅翁丁村老寨據了解已經有400幾年嘅建寨歷史，入面居住咗佤族族人，呢類佤族傳統民居建築群亦都保留咗佤族傳統文化，翁丁佤寨就更加被視為係整個佤族地區文化傳承發展嘅重要源生地。翁丁村老寨村域面積6.3平方千米，所謂嘅「翁丁」喺佤語入面就係解做雲霧繚繞嘅地方。翁丁古寨入面嘅落地式茅草屋頂建築仲係沿用原始佤族干欄式，相關嘅寨樁，牛頭樁，火塘，鍋樁，木雕，木鼓，牛頭等等特色仍然保留至今。

翁丁村老寨村唔單止係一條原住民居住嘅地方，佢仲係中國部落文化最後嘅一個活體，翁丁村嘅《佤族木鼓舞》、《司崗里傳說》近年就被列入國家級非物質文化遺產保護名錄，翁丁村亦都喺2006年仲被列入雲南省非物質文化遺產保護名錄，難怪被被《中國國家地理》雜誌譽為「最後的原始部落」。

原圖嚟自網絡