今年係牛年,當然係要同史友們繼續介紹歷史上嘅一啲「神牛」應一應節啦!早兩日就同大家講完田單嘅「火牛陣」同埋香港慈雲閣嘅一隻「靈牛」,今次阿史就想介紹下「木牛流馬」。

「木牛流馬」當然就唔係一隻牛名,就咁聽個名仲可能以為佢係咩交通工具,但呢度真係講開有段故喇!相傳「木牛流馬」係三國時期蜀漢丞相諸葛亮同埋蒲元等人發明的嘅運輸工具,喺史書記載就係喺建興九年到十二年間,諸葛亮喺北伐果陣所用到嘅一種工具。「木牛流馬」係一個統稱,實際上呢樣工具係分成「木牛」同埋「流馬」,係一種載物嘅運輸工具,據記載佢嘅載重量係可以有「一歲糧」,亦即係二百公斤左右。雖然運送住咁重嘅貨物,但每日仲可以達到「特行者數十里,群行二十里」嘅速度,當時呢款工具就為蜀國十萬大軍提供糧食。

《三國志註》引《諸葛亮集》就有記載到「木牛者,方腹曲頭,一腳四足,頭入領中,舌著於腹。載多而行少,宜可大用,不可小使」。喺呢部分嘅史料,入面仲有詳細講到「木牛流馬」唔同部分嘅尺寸、功用等等,甚至仲有機關可以防止敵人奪取糧食,只係呢款工具到底實物係點,現世就真係未有機會見到,只可以接史書所講推測出嚟!

原圖嚟自網絡