《色戒》原型女特工鄭萍茹

2007年果陣就有一套名為《色戒》嘅電影上映，呢套電影改編自張愛玲創作嘅同名小說，甚至當年得到公眾、電影業界、甚至張愛玲研究者高度好評。電影入面由湯唯飾演嘅王佳芝實際上係有一個原型嘅人物，佢叫做鄭萍茹。

鄭萍茹嘅出身本來就唔平凡，佢嘅爸爸係國民黨上海高等法院法官，同時亦都係老同盟會會員，鄭萍茹自己亦都係一個中日混血兒，出生喺1918年嘅日本名古屋。早年佢嘅生活就十足十一個上海名媛，就讀上海法政學院，日文相當流利，仲喺1937年作為封面女郎登上上海第一大畫報《良友畫報》。

只係好景不常，喺上海淪陷之後佢就決定加入中統，利用佢先天優厚嘅條件混入日偽人員當中獲取情報。而提到佢間諜生涯最著名嘅事，除咗有計劃綁架日本首相嘅長子近衛文麿（但最後作罷），另一件就莫過於係參與暗殺日偽特務丁默村（亦即係電影入面嘅梁朝偉）。佢喺呢次任務入面不幸暴露身份，被捕時雖然堅稱為情所困而僱兇殺人，但最後都係喺1940年被秘密處決，連中3槍身亡，當年佢只係得22歲。