香港現存唯一戰前戲院——油麻地戲院

繼續同史友們介紹一啲香港嘅歷史建築，喺上世紀嘅香港由於娛樂嘅設施唔太多，加上電視機仲未普及，電影就成為咗市民最主要嘅娛樂。喺戰前有唔少戲院建成啟業，但真係完完整整保留到依家嘅，就真係得油麻地戲院呢間。

位於窩打老道同埋新填地街交界嘅油麻地戲院，以往就有「五大戲院」之一嘅稱號，現時就已經被列為二級歷史建築物並且活化成戲曲活動中心。呢間喺1930年建成啟用嘅戲院，早期係以播放默劇為主，去到1934年先至轉播有聲嘅電影，由於所在之處係油麻地碼頭同埋油麻地果欄一帶，所以當時成為唔少苦力、艇家同埋車夫消遣嘅地方。

而去到1960年代，油麻地戲院又有啲變化，呢個時候可以話係油麻地戲院嘅黃金期，經常都放映邵氏電影，經常都滿座。時候去到80年代，老式嘅油麻地戲院競爭慢慢下降，雖然都做過唔少翻新工程，甚至加入過「金公主院線」、「日活院綫」等等，但生意都依然式微，最後喺1998年7月31日正式結業。